SUID-AFRIKAANSE wetenskaplikes het 'n chemiese stof in drinkwater en alledaagse plastiekware ontdek wat volgens navorsings-resultate bydra tot die skerp afname in manlike vrugbaarheid, en die gelyklopende styging wêreldwyd in die voorkoms van onder meer prostaatkanker. 
 Die chemiese stof, p-Nonielfenol (p-NP), kom algemeen in die meeste vorme van plastiek voor  –  van PVC-waterpype tot die kleefplastiek waarmee kos daagliks in miljoene Suid-Afrikaanse huishoudings toegemaak word. 
Nege verskillende soorte kleefplastiek is getoets en binne 26 uur het 100% van die p-NP uit die kleefplastiek in die kos uitgeloog. 
Navorsing het bewys dat dit ook loog uit die PVC-pype waarmee drinkwater na huise gebring word. Die stof kom ook voor in petrochemiese produkte, soos ghries en petroleum-jellies  waarmee  babas  se boudjies ingesmeer word, hars, polistireen, waarvan houers vir wegneemkos gemaak word, skoonheidsmiddels, haarwasmiddels en sekere huishoudelike  en  nywerheidsreinigers. 
Dr. Tian de Jager, van die Departement Urologie aan die Universiteit van Pretoria se mediese skool, het navorsing hieroor in sy doktorale proefskrif gepubliseer, en saam met kollegas wat by die navorsing betrokke is, al voordragte daaroor op verskillende mediese forums in Bloemfontein, Durban en die Kruger-wildtuin gelewer. 
 Dr. De Jager het op die Fakulteit Gesondheidswetenskappe aan die Vrystaatse Universiteit se forum die resultate van sy navorsing voorgedra. Toetse wat volgens die aanvaarde internasionale standaarde op rotte uitgevoer is, het die navorsingspan se ergste vrese oor die uitwerking van p-NP op vrugbaarheid bewys. 
Die grootte van die rotte se geslagsdele het gekrimp en die gehalte van hul semen het dramaties afgeneem. Die testes en epididimus is daardeur vergiffig. 
Navorsing in Brittanje het bewys dat die p-NP deur die liggaam met die vroulike hormoon estrogeen verwar word. Die liggaam reageer so dramaties op die teenwoordigheid van die gewaande estrogeen dat die geslag van manlike forel wat in Brittanje naby die uitlaat van 'n watersuiweringsaanleg losgelaat is, binne drie weke so verander het dat hulle die proteien begin produseer het wat vir die vorming van eiers nodig is. 
Verdere navorsing het bewys dat vis,  voëls  en  soogdiere  p-NP  as estrogeen hanteer. Dr. De Jager en sy kollegas se huidige navorsing het reeds bewys dat dit ook die geval vir mense is. 
In sy proefskrif sê hy meer as 20 000 ton p-NP word jaarliks in Brittanje geproduseer. Geen plaaslike syfers is beskikbaar nie, maar die  stof word wyd in die Suid-Afrikaanse plastiek- en kosverpakkingsindustrie gebruik. 
Mense kan deur middel van drink water met p-NP vergiftig word. Dit kan ook deur die vel opgeneem word, omdat dit in haarwasmiddels, skoonheidsmiddels, spermdodende smeermiddels en huishoudelike en nywerheidswasmiddels voorkom. 
Mense kan dit ook inasem, omdat dit  in  insekdodende  spuitmiddels voorkom. Kos wat gekweek is op lande wat met rioolslyk besmet is, kan ook daarmee besoedel wees, as die rioolslyk alkielfenole bevat. Kos kan ook deur die verpakkingsmateriaal besoedel word. 
Die navorsingspan glo die verband tussen die afname in vrugbaarheid en kanker van die testes en prostaat bestaan wêreldwyd en werk nou daaraan om die rol wat p-NP, en ander middels wat deur die liggaam as estrogeen ervaar word, hierin speel, bo enige twyfel te bewys.